apan ang kasubo, ang kasakit nganong siging panobra?

nganong paspas na man
kaayo ang pagdagan sa
atong panahon?

ang lunes kaganiha lamang
kalit lang nga nahimong
byernes? 

ang pangadlaw nga kaganiha
haskang putia og sinaw
kalit lang nalaya og dayog
kahulog sa tiilan sa kahoy

nganong paspas man ang
pagdagan sa mga orasan?
karon pa hinoon nga mao
pay pagsugod nato sa 
paghangop sa kalipay

karon pa hinoon nga nabati
ko na ang kainit sa imong 
dughan ning kamot kong
siging ginapanugnaw?

ngano ba nga magselos man
ang mga oras kon kita 
magmalipayon? 
nganong
gusto man niyang humanon
dayon kining panaw sa
himaya?

pagkamubo sa panahon 
sa dihang gihagkan ko ang
imong aping,
 sa dihang
gitam-osan ko ang imong
dila, 
sa dihang gihakop sa
akong mga bukton ang imong
lawas,
 sa dihang gihangop ko
ang kahumot sa imong kalag...

kanunayng kulang, 
kanunayng
kulang ang panahon sa kalipay

apan ang kasubo,
 ang kasakit
nganong siging panobra?

og sa dihang napuli ang 
kahapdos na usab sa mga
samad, 
nganong langayan
naman ang mga adlaw?
nganong taas og lalom na
man kaayo ang mga kagabhion?

o, kinabuhi,
 o kamatayon
palihog, pasabta kami kabahin
niining mga bahina...