4/21/2015

feelings of guilt...

sa imong pag-inosara sa lawak
(kuyog sa dili nimo maispeling nga kamingaw
ang kagul-anan nga dili mo madrowing)
nakigsandurot ka sa imong kamot
dayon ang mga tudlo nagsugod og sugilon kanimo
sa ilang tagsa-tagsa ka kinabuhi,

ang singsingan miingon nga siya matag adlaw
gituok
makaginhawa lang kon hugasan nimo ang imong
kamot sa humot nga sabon
sa dili ka pa mokaon,

ang imong kumingking nangandoy nga unta imo
siyang ambaton panalagsa bisan sa iyang
kamubo og kagamay

ang kanunay mong gigamit sa pagpanghingugmo
gibati ang kasumo sa iyang trabaho
nangandoy nga unta puhon mokuhit ka usab
sa tiil sa Kristo didto sa Quiapo

ang tunga nagbasol nganong kanunay mo siyang
masamdan inig hiwa nimo sa lemonsito
ang iyang sakripisyo kanunayng doble
samad nga gihumulan sa kaaslom

human niini gihangyo ka sa imong kamot nga makigdula
sa iyang anino
ambot ug nakahinumdom ka ba kaniadtong gamay ka pa
nga sa suga nga lampara
gihimoan mo siyag anino sa ulo sa iro, dayon sa pako sa salampati

gusto niya ang iro, kadtong irong buang, kadtong kusog mopaghot
og mopaak
ayaw lang ug kasuko

gusto ka niyang paakon.

No comments :

Post a Comment

Lami ba?