kamatayon

ang kamot sa kamatayon
nga naghinayhinay og haploy sa
imong kiting
diha sa mga usahay
giwakli nimo sa ginagmayng
kadaugan

dunay miabot nga
kwarta gikan sa america
nga wa nimo damha
pinadala sa imong amigo
nga ang ngalan
putol na lang ang imong
nahinumdoman

dunay balak nga imong
nasulat nga wa nimo damha
nakapakiay sa imong
utok

dunay kahayag sa langob
nga kanunay mong
gipuy-an
og kinsang anghel kaha
ang nagsabwag sa mga
buwak sa imong
agianan?

lamian ang gisukad sa
lamesa
sa panihapon kagabii
og ang kabusog
nagpabilin gihapon
ning sayong kabuntagon
sa tiyan mong
gibutdan

nanimahong haplas ang
higdaanan
diha sa habol nga dili
na nimo ganahang 
pil-on

pag-abri sa bentana
mahanggab mo ang presko nga
hangin
gikan sa mga punoan sa
kahil


gikapoy ang kamatayon og
mibalhin una kini sa iyang gihigdaan
didto sa gawas
siya una nagduyanduyan

gibugaw siya sa pahiyom
gibidlian sa imong talagsaong
katawa