2015/04/23

monica

ang apapangig ni monica mosamot kadako kon siya
mobohakhak og katawa
kaming nagtan-aw og namati dali ra kayong natakdan
sa iyang pagkamalipayon samtang
ang kahaponon naghinayhinay na og paniklop sa iyang
payong

lami ang kaniadto diha sa mga buongon nga nangahinog
sa punoan  unya mubo lang ang maong kahoy
busa dali ra kaayong kab-uton

nanglingkod kami didto sa kawayan nga lingkoranan
nga hinimo ni tatay gorio
atbang sa kalsada nga talagsa rang labyan sa Lilian
paingon sa Zamboanga
og samtang nagpanit sa buongon masimhot ang kahomot
sa maong prutas
nga hangtod karon kon mahinumduman si monica
ambot og asa na kaha kadto siya gibutang sa Ginoo
mora bag makaapil gihapon ako sa iyang katawa kabahin
sa gagmayng mga butang ning kalibotana


sama sa iyang giingon nga si Pahak kuno og si Bungi
nagkauyab na og didto dapit sa bermudahan nagkomida
maong maayong pagkahap-ag sa mga bulak sa daplin
unya morag naupaw ang balili

daghan kaayo ang mga buongon nga ang moabot sa pikas
balangay kon mangayo kini wagas kay dalhan man kini nila og
bukag

dili gwapa si monica. Itomon og kaniadto ang itomon maoton gayod
negra, agta, mao kini ang iyang ngalan kon makakita na siya og layog
sa iyang kontra,
dili sab siya brayt, dagko og bagtak, mubo ang iyang mga tudlo, kubalan,
dagko ang iyang lapalapa,
sa hamubong pagkasulti, dimalas ang iyang nawong,
wala kay makita nga angay niyang ikapanghambog

apan usa lang: si monica kanunayng malipayon
dili maulawon, ang iyang katawa kanunayng maglanog-lanog
sa sayong kabuntagon hangtod na kana sa kahaponon

gipangita kanunay si monica sa tanang gamingaw sa balangay
sa Olingan
imbitahon og paniudto, kuyugon sa baybayon matag Domingo,
ug uban pa
kay siya man ang magdala og magpatakod og katawa
sa mga nagsubo unta (ug dili na ganahang mabuhi)
sa mga gipangbudhian sa bana, gibiyaan sa uyab,
sa mga nailad, og sa mga gidaug-daog sa lakat sa kinabuhi


wala na ko kadungog kon asa si Monica.
Dunay dakong kasamok kaniadto. Naapil si Monica
sa maong pag-ulbo og hangtod karon wala na gayod
siya igdungog kon naunsa og asa og ngano.


siya ang kalipay nga nawala og wala na gayog hikaplagi pa.
apan dili kini magpasabot nga ang mga nangabilin dili na makat-on
kon unsaon pagmugna ang laing katawa didto sa balangay
nga daghang buongon.

Panginhas dire