kalahian

kaniadto
mapaakan pa ang akong
kiting sa mga alimango
nga daghan kaayo
sa suba sa Dicayo

dali rang sikopon ang
rami og poyo
unya dili magutman ang
mga it-it og 
tikarol diha sa punoan
sa kondol

kaniadto magtupad
ang kabaw og ang
iyang agalon nga
mangaligo sa suba
human sa trabaho

pagkalahi na karon

wa na nako makita ang it-it
nihit na usab ang tikarol
ang suba sa Dicayo
lubog na pod kaayo
ang mga alimango
nagpuyo na lang sa damgo
ug ang balita
gisungag sa kabaw ang
iyang amo

patay.