2015/04/01

samtang gipasakay sa kabaw ang puting tulabong sa iyang bukobuko gigigkan usab kini sa iyang pagpanghinguto.....

gamitay lang gayod seguro ang
kinabuhi
bisan gani sa gitawag nilang
panaghigala

ang uban manghambog
gimahal ako niya
bisan wa ko yamo bisan
og ako usa ka buwak na nga
malawos
iya gayod akong hiposon diha
sulod sa iyang bulsa duol sa
iyang dughan
aron sa kanunay mabati ko ang
mga pinitik sa iyang
kasingkasing

adunay magmata og buntag
adunay magdamgo sa udtong tutok
adunay maglantaw sa utlanan
nga blanko kaayo ang pangutol
adunay maglutok diha sa katibugok

gidawat ko nga ako
usa sa imong galamiton
dili ko ikaulaw nga ako
imo lang gamiton
kay sama kanimo ikaw usab
usa lamang ka kutsarita sa
akong init nga kape
o dili ba platito sa lubot sa
akong tasa

ah, dali diri sa umahan
lantawon ta ang panaghigala sa
usa ka kabaw og usa ka tulabong
dugay na sila
diha sa gamitay nga panagsuod

samtang gipasakay sa kabaw ang
puting tulabong sa iyang bukobuko
gigigkan usab kini sa iyang
pagpanghinguto..... 

ah, ikaw usab
ania miingon kanako nga ako
imong gihigugma
og gitubag ko kini sa usa ka
pahiyom
gitugbangan sa mga halok
og gakos sa akong mga bukton
og ingnon ko ikaw nga ako
mitoo sa imong 
pagpangumpisal diri kanako

ah, usa ako ka pari
nga tuso
o switik
daghang hapin-hapin
kining akong gisul-ot

Panginhas dire