2015/12/04

wa gayod nausob ang
lakat sa panahon kabahin sa mga nagkatuagsa nga mga balak

gibalikan mo og basa ang uban diha sa ilang gitukuran
mabati mo ang mga bagting sa mga kampana diha sa imong kasingkasing

aduna kay mahinumduman sa mga pulong nga gisang-at diha sa mga sanga
sa kahidlaw
nga inigtukar nilang tanan mabati mo ang kasadya sa pista apil na ang mga
tingog sa mga bata nga nanagdula didto dapit sa simbahan nga giatbangan usab

sa mga manindhay og mga ukay-ukay, mga makaon, mga gamit sa panimalay
didto sa plaza

alang kanimo mao kini ang imong kalibotan: anaa ang mga pagmahay, ang mga
kalipay nga wala madayon, ang mga butang nga wala nimo mahimo bisan untag ganahan
kang mobuwag sa imong mga kauban nga nagtoo nga ikaw sama kanila

sa pungpong sa mga prutas didtos basket, ikaw ang nalamog nga tabili nga
mitago sa ilang kadaghan
sa mga salag-on diha sa bukag ikaw ang tam-is nga tubo nga wala mabali

nagkatuagsa ang mga pagtoo labi na ang mga sukwahi sa naandan 
sa mga dili na kinahanglan maghunahuna pa, walay pulos ang tanan

unya ikaw nga kanunayng nangalap sa pulong, namunting sa tanghaga
mora ka lamag og amag sa ngitngit, tipal-o nga gipisat makita lang ang 

pagsiga sa dugo, sa ilalom sa katre, sa tungang gabii.

Panginhas dire