2015/12/17

balik lantaw sa kaniadto sa usa ka fariseo


 i
kaniadto
sige silang laag
tan-aw og sine
suroy sa plaza
mamalit og pan init
bisag gabii na kaayo
dili makapuyo
sa balay
nga mora bag
ang ilang tiil
siging gahalang

ako tawon
siging magtoon
sa kwarto
morag konbiktado
sa salang
pagpatay

ako ang makalung-ag
sa pamahaw
kay nakatulog pa sila
kay siging
kabilar

sa kaadlawon
manglampaso human
og repasa
sa mga nabasa 
kagabii disir
matulog

naluto na ang kan-on
andam na ang 
inun-unan
kon makamata sila
igo na lang
mokaon

sahay moingon pa
"kapoya pod nimo oi
sige ra mang kang
basa? kon bright ka
nganong magtoon 
ka pa man?"

wa na ko mag-ambat
nadawat na nako ang
among panaglahi
sa batasan og sa mga
damgo sa 
kinabuhi

ii

milabay ang panahon
milabong ang syudad
nangaminyo
sila
kasagaran wala kahuman
sa pagtoon

karon naglisod
sa panginabuhi
di kapalit og bugas
walay klarong pamuyo
siging away sa ilang
mga bana og asawa
kay lagi
lisod unya wala may
kwarta

iii

lahi na ang plastada
"nganong halab ka man?
nganong di ka man makatabang
sa among kalisod?
nganong di ka man 
motabang kanamo?
wala kay puangod
di ka kamaong mosabot"

iv

dili ko na maambat
managlahi gayod ang among
dalan
ang among mga panglantaw
ang among mga damgo

v
alang kanako
giani ko lang ang akong tinanom
gipupo ko lang ang mga bunga sa
akong mga pag-antos og kahago

vi

sa akong balay nga habog
lantawon ko ang akong hardin
dili sab ko maninghawak
balikan ko ang ang akong kagahapon
sumsuman ko ang kalipay karon
dimdimon ko ang katam-is
sa akong kinabuhi

ako na sab ang mokatawa
apan dili kaayo nako kini kusgon
dili sab ko ganahang mag-aso
nga morag way puas nga pugon 
ania ang akong pahiyom
mapasalamaton, mainampoon
sama sa kaniadto
sud sa akong kasingkasing
magpabilin ang pahiyom sa kahilom
diha sa pagpailob
sa tumang kaalam

Panginhas dire