12/05/2015

adunay kanunay nga nagdagan
apan walay gigukod

gigukod niya ang mga oras
nga wala mangambat kaniya

kon mauna siya sa orasan o
kon maulahi man, unsa man dayon?

walay tawong nakaapas sa oras
walay oras nga sukad mipaabot sa tawo

walay oras nga miduyan sa kusog modagan
walay oras nga mipainom og tubig sa gakutas

sa dihang mihunong ka nawala ang oras
sa dihang milantaw ka sa alibangbang 

nga naglutaw lutaw sa hangin sa
dihang gihangop mo ang buwak nga

nahulog sa tungod sa imong bentana
gikan sa sanga sa dakong punoan sa ylangylang

nausob ang oras, miduko kini, milingkod sa salog
miawit sa usa ka puya diha sa duyanan

samtang ang inahan nahikatulog sa kakapoy
sa walay undang nga pag-iyak kaganiha

sa mga piso nga gibiyaan sa inaan nga
milabot sa iro nga mipaghot kaniya.


No comments :

Post a Comment

Lami ba?