2015/12/07

kinsa ka ba usab, animala ka?

pagkataas ra gayod sa
panglantaw nimo sa imong
kaugalingon

sa dihang mihatag ako
kanimo og unta pasalamat
o halad ba kaha sa usa ka
kalipay
imo man kining gibalibaran
kay lagi ikaw puno na
og sa imong dughan wala
na may kapahilunaan

sulod sa imong labat ang
among makita mao lamang
ang ginagmayng kahayag
sa kilid sa atop sa imong
panimalay

nasayran ko na ang tanan
gihapsay na ang mga katarungan
gihapnig na ang angayan og
dili angayan
unsa pa ba kaha ang dili ko
masabtan?

kanunayng mong gipakita
kanako ang kalantip sa imong
hunahuna
hait nga sundang nga makaputol
sa kawayan sa usa lamang ka
tikbas

labaw ka o halangdon
kon makaasta ka 
ulod lamang kami nga
mikaon sa unod sa usa ka
patay

labaw ka o halangdon
kon makatan-aw ka kanako
usa lamang ako ka
baho nga suban-on

gitugutan ko kini
diha sa tinipigan mo nga katawa
og diri sa taas sa bungtod
sa akong kaugalingon nga
balay
sa ako usab nga toreng garing
ania ako
milantaw kanimo
og sa atong kalay-on
og sa akong katas-on
salamat usab nga dili
mo na madungog ang
akong buhakhak 
og kamaya

Panginhas dire