2015/12/07

basin unyag mohilak ang mga patay

tiguma ang
imong para ugma

pasagdi nga karon
ikaw gidaug-daog
gitamay
gibalewala sa ilang
panagsalo
og kon gihusgatan
man ugaling
ang imong makita
mao ang
ilang pangyam-id

tugoti ang pisi sa 
ilang kahakog
himoang puno kaayo
ang ilang mga 
pagkalos sa tubig
sa atabay 
sa imong pagkagamay

tiguma ang tanan
ibutang sa lawak nga
kada adlaw imong
pagasirad-an

inig abot sa ugma
sa ilang pagkahubog
diha sa kahakog
sa ilang pagkasarasay
nga dili na gayod sila
makatindog

nianang taknaa
kuhaa ang imong 
kaugalingon ug
tinagoan kopa
ang imong gitan-ogan
nga bino
ang botelyang imong
gihapnigan sa 
habot didto sa imong
gitago nga 
lawak

tagay sa bulan
diha sa kagabhion
ayaw kaayog kusga
ang imong katawa
basin mohilak ang
mga patay

Panginhas dire