2015/12/15

kabahin ni nong karpo

si manong karpo nga
wala pa kadawat sa kamatayon
ni manang
celia

kanunay nga nagpaabot
sa paghandom sa duha ka 
adlawan

adlawan sa kamatayon og
adlawan sa kinabuhi

sa lawak nga mamingaw
anaa ang hikay sa mga patay

sa gawas sa balay
saba ang kinabuhi

gisulayan pagtagbaw
ang kalaay og kamingaw
sa daghang botelya sa
tanduay og beer
gipabusdik ang tiyan sa
mga letson og humba 

makabungog ang mga buhakhak
makalisang ang mga sugilanon
ang mga bata nagdagandagan
ang mga tiguwang nalipay nga naglantaw
ang mga bag-ong minyo nagsiplatay
ang mga dalaga og ulitawo
nanag-unot sa kilid sa pultahan og
mga bentana

sahay malantaw ang mga lingkoranan
nga walay tawo
ang hardin nga namuswak apan walay
misuroy

kon makita lang unta sa atong mga mata
hayan matagbaw ka usab unta
sa pag-abot sa mga patay
nagpagawas usab sa ilang kalipay
apas sa atong mga ginagmay

mihilak kaganiha na usab si manong karpo
matag luha nga nahulog
halad sa mga dili na mahikap og madungog
sa dili na mahagkan og magakos
sa mga umaabot nga karon dili pa niya
maangkon dili pa niya masabtan


Panginhas dire