ang pagsulat
mao ang pakighimamat sa kaugalingon
usa ka hapon niana
miabot ka nga walay kaligo gikan sa
halayong dapit nga og pangutan-on ka
dili sab ka manugid

gitunol mo ang imong kamot sa usa
ka lamano
gidawat nako dayon ako kang
gitimplahan sa kape
tupad sa usa ka biskwit pamugong
sa pulso hugong sa gipaabot nga
nilung-ang nga kan-on og
inun-onang diwit
para sa atong panihapon

gibalikan nato ang kaniadto
kadtong nangaligo ta sa suba
sakay sa kabaw
kadtong hubo kitang milangoy
nangitag kalong 
og mga kinhason sa kilid sa
kanipaan

mas daghan ang imong nakuha
nga tuway
apan mas dako ang akong
isda nga haw-an nga nakuha sa
akong pasol

dungan tang gapauga sa silong
sa adlaw
dayon natog pamauli sa atong
balay

medyo namula ang imong mga
mata sa kamingaw
samtang mibatog na ang kahaponon
sa kilay sa balay

inig pangatulog puhon
karong kagabhion
ikaw nga akong kalag
mahinanok na usab sa akong
lawas