2015/12/09

mora kog tore
sa isla
nga walay tawo

karon nga
nakat-onan ko na
ang tinagoang
gahom diha sa
pag-inosara

sa kagabhion
ako ang aninipot
sa kaadlawon 
ako ang yamog
sa kabuntagon
ako ang tukmo
nga amang sa
punoan sa kasoy

mora kog isla
nga nagbarog
sa lawod
nga wala maghandom
kon ugma damlag
adunay
sakayan nga masaag

nganong karon pa
man kini
nako nabati?

kaniadto ihatag
ko ang bulan
aron lang ako
imong dalitan
sa pahiyom mong
tinagoan

kaniadto makaulaw
kaayo nga ako
nagpalimos sa imong
pagbalos

nganong karon pa
man nako kini
naamgo?

wala na ako
magkinahanglan
bisan og usa ka
anino.

Panginhas dire