3/09/2015

ang sugilanon sa agukoy

gipatawag siya sa principal sa high school department
ug giignan

" mrs. (itago lang nato ang iyang apelyedo)
buslot man god ang ilokan sa uniporme sa imong anak
unya kum-ot pa gyod
gukdonon sa plantsa ang iyang purol
unya morag walay laba,
mahimo ba nga unta imo kining akatahan?"

" sus mam, sorry jud kaayo,
sagdi lang, kay sa sunod, plantsahon ko na gayod
pag-ayo ang iyang uniporme,
sulsihan ang ilok,
og dayon gamitan ko nag sabon panglaba
ang iyang purol"

"kumusta man tuod ang akong anak?
dili ra ba maldito sa klase?"

"maayo siya sa klase. Sige lang siyang gaduka,
apan siya ang among paglaum nga mag top sa
NCEE"

"ay salamat, maayo gani kay wala kini
maliwat sa iyang amahan nga palahubog"


ang wala masayri sa principal mao ang
ka-busy sa inahan
sa pagpangita sa kwarta aron igasto sa
pagtuon sa anak,
piniritong saging, paghimo sa puto,
ice candy, camote cue ug uban pang
mahimong ibaligya diha
sa merkado

ang iyang anak giingnan
kamo nay bahala unsaon ninyo
pagdiskarte sa inyong pagtuon
ako ang bahala sa pagpangita
og gasto alang kaninyo

(milabay ang panahon
nangahulog ang mga dahon sa
akasya
giulod panalagsa
apan nangawagtang ra usab
naupaw ang mga sanga
apan nanalingsing pag-usab)

bugnaw ang hoyohoy sa hangin
miulan, miinit, mibagyo
milinaw ang kalibotan

duna pa gani gubat, patay,
kidnap, lukat
ambush, binudhiay

namatay ang inahan sa edad
nga 86
gikulinitan sa diabetes ang
iyang mga unod
mipanaw usab ang principal
gikahig sa brain tumor ang
iyang kalag

naabogado ang batang
gisi og ilok
naminyo, nanganak
nakigbisog sa mga kabos
og dinaugdaog....


mao kini ang sugilanon sa
agukoy didtos daplin sa baybayon
walay tubag sa kataposan
tungod kay sa kanunay
siging abli ang mga bintana
sa kalangitan

No comments :

Post a Comment

Lami ba?