2015/03/13

kahigwaos sa usa ka magbabalak

gisugo ko ang usa ka bata sa pagpamaligya og
libro sa balak niadtong usa ka semana gani 
giingnan ko pa man siya nga kon dunay mohangyo
bisag tinunga sa presyo sa kahago pahangyoa lang.

mibalik ang maong bata gabagood gihapon sa iyang
bug-at nga dala,

walay halin.

mihangyo siya nga kon mahimo aron bibo ang iyang
pagpamaligya nga mas maayo seguro kon ang akong
ipabaligya kaniya  mao na lang ang iced candy nga 
nangka og dili ba kaha cassava cake na lang.

didto sa taboan matag sabado mas halin kuno ang
ginamos nga tuloy, bulad nga mangse, tapok sa 
camote, og manok bisaya.

kon prangka pa lamang ang maong mamaligyaay
yano lang kaha unta niya ang pag-ingon nga undangi
na ang pagpaningkamot og mugna sa mga balak nga
dili gayod mahalin sa taboan.

karon dili na ko magpabaligya og mga balak
dili na nako kini ibaligya

gamson ko na lang hangtod nga mamawos na kini pag-ayo
og kon humot na gayod
akong isuwa sa manggang hilaw
ug ang kalami sa kaaslom ug sa kaasgad
akong tagamtamon sa akong
pag-inosara.

Panginhas dire