3/27/2015

si Lolo Miguel

si Lolo Miguel
namatay sa among kamalig nga
butanganan og sinakong humay nga nag-inosara

daghang nakapangutana kon nag-unsa siya didto
ug nganong kadtong lugara ang iyang gipili isip
pahulayan

kanunay siyang gilimbongan
kanunayng gikawatan ang iyang mga sinakong humay
gibantayan kaha kini niya

iya kaha kining giihap unya kay lagi nagkulang na man usab
gikasakit kini niya pag-ayo
o dili ba kaha
gilanaban ang iyang kasingkasing sa tumang kasuko
busa siya nahapla

nalimtan kaha niya ang iyang giingon kanako nga aron
ang tawo dili madutlan sa kasakit
o kasuko
hinolan kini niya sa hampol sa pasaylo

o dili ba aron makab-ot ang gitinguhang kalipay
patas-an niya ang kuhit sa pagpailob

nalimtan kaha niya ako nga iyang gisulayan og bilin
sa iyang pangalan?

No comments :

Post a Comment

Lami ba?