2015/03/15

usa lang ako ka panganod nga libot suroy sa langit. nagtanga.

?

ang pagsulat kuno unta adunay katuyoan.
unta sa atong mga pulong mausob ang katilingban.
ang mga bugoy mabuotan.
ang mga pobre mangadato.
ang mga masakiton maayo.
ang mga bakakon magsulti nas tinood.
ang suka mosamot kaaslom.
ang asukar dili na makadiabetes.
ang asin mosamot kaputi og kaasgad.
ang suba motin-aw unya makita ang mga siwil.
ang dagat magsiging linaw.
ang mga barkong nalunod motimaw.
ang mga patay mabanhaw.

kahago ba.

apan dunay pagsulat nga
yano lamang.
molantaw. mamati. 
ayohon og dungog.
ayuhon og bulikat.
bisan unsang pulong
og bisan sayop nga
pagkasulat basta
ang importante nga
nasulat ang nakita
uyon lamang sa nakita
nadungog natilawan


dili daw iapil ang 
pagbati kay basin
og masipyat ang
kasingkasing.

kahago pod.

sa akong kabahin
nagsulat ako sa kalaay
sa akong kinabuhi.

anaay adlaw nga di 
nako masabtan kon
unsay akong katuyuan.

daghang mga adlaw nga
wala na ako masayod 
kon unsa ang akong buhaton.

unya kining mga adlawa
haskang dugaya mahuman.
morag gipaulit ang akong
kinabuhi.

ingon siya kulang kos
paghigugma mao ang
ang akong mga adlaw
morag lastiko nga
giinat-inat, siging giinat

unya hadlok gani siya
nga basin og tago na kini
og unya maputol.

kahago gayod.

apan mao kana ang tinood.
usa lang ako ka panganod
nga libot suroy sa langit.

nagtanga.

Panginhas dire