gisul-og ko lang ang giingon sa
mga nahiuna
og sa mga nanglabay
diha sa mga antigong mga
katuigan
ang disyerto usa ka blanko nga
papel
matag gabii moabot ang bulan
modan-ag og sa kanunay
isulat niya ang hinulamang
kahayag
sama ning lawas ko
sama ning kalag ko
sama ning kinabuhi ko
usa ka blankong papel
sama ning karon
usa ka blankong papel
nga sa akong mga kabalaka
gisulayan ko ug sulat ang mga pulong
nga sa akong kakapoy usahay
dili na nako mapuno sa unta ako
pang masugid
dunay mga lat-ang diha sa
tunga sa paa
dunay wala makita diha
sa tunga sa dughan
bisan unsaon ko ug paningkamot
nga mahayagan ang tanan
anaa pa gihapon ang mga nagpahipi
nga kangitngit
nga sa akong paghikatulog
itunol usuhay kanako sa mga kamot
sa damgo
pagkadaghan
pinungpong kining
mga misteryo
No comments :
Post a Comment
Lami ba?