2015/03/12

naandan

matag adlaw
mosipat ang mga
mata
usahay sa
daghang bantayan
makalimot na kini
og pamilok

matag gabii daghan
ang angayang
isulat

kon imong isugid
wa say ganahang
mamati

kay ang kadaghanan
gikapoy
inig abot sa balay
hapla ang lawas
sa katre nga gahing
kawayan

ialugnan ang mga
kasubo
ibukot sa habol
ang mga kawad-on
ipanirado sa bintana
ang mga
makauulaw nga
panghitabo

aron mawala ang
di malimtan
mosulod kitang
tanan sa pultahan
sa damgo
mokuyog sa iyang
mga lilo
og mga lingla
aron pagkaugma
basin og
mangaba-o ang
plastada sa kinabuhi

makamata kita og
sayo
sayo pa sa mga
manok
og mga kalanggaman
sayo pa sa mga iro
nga gani nagbilar man
usab sa kagutom
sayo pa sa mga iring
nga nanglungkab
sa kalderong inun-una
didto sa kusina

daghang mga
kabalaka
wad-on kinis
pagpanglimpyo
sa salog
panglaba sa mga
bulingon
waswas, kusokuso
hayhay

moabot ang oras
sa pagpanamin
walay mota ang
mata
walay buling ang
aping
hapsay ang karsones
saktog tindog ang
kwelyo
humot ang polo
sinaw ang sapatos
og ang buhok
mogilak diha sa
adlaw

lingi sa wala
lingi sa too
sugdan na usab
ang naandan nga
trabaho.
 

Panginhas dire