2015/03/05

ako ang nahigugma
nga napriso sa akong hunahuna

ang akong kasingkasing
nalumos sa mga lubog nga tubig
sa inyong mga
pagtoo

ako ang langgam nga nindot
ug gamhanan diha sa akong
lapad ug taas nga pako
nga kamao untang molupad
apan wala gayod
milupad paingon sa mga
panganod
aron makita ang tinood nga
larawan sa mga sapa ug
kabukiran

ako ang nahigugma
nga nalaya sa akong kaugalingong
sanga

ako ang nahigugma nga
nawala

apan lantawa ang akong lawas
ang akong nawong
himsog ako
malipayon diha sa pahiyom
sa buhakhak ug mga katawa
natong tanan

pagkahuman niini
mosulod na usab ako sa lawak
nga sa kamingaw
naghatag na usab kanako og gahom
aron pagtagik sa mga pulong
nga nagpabiling
mga batang nag-agik-ik diha sa
unot nila sa ilalom sa moskitero
samtang ang nanay
miluhod atubangan sa santos
sa birhen
aron unta kaming mga bata
magpabiling lumo
magsunod sa mga pamalaod
alang sa gugma

kay kadtong mga mikatkat
sa labat
kay kadtong miambak sa bintana
kadtong nanagan
aron pangitaon ang wala pa nila
sukad mabati

nangamatay na man
gilubong
og dayon sama sa mga nahiuna
puros nahikalimtan

Panginhas dire