2015/03/15

desenteng haya alang sa malipayong kamatayon.

gihadlok kos usa ka linya sa akong palad
nga akong gilantaw usab pag-ayo gisusi nga morag
microscopic organism

migimok, morag tawong niwang, upaw, tag-as kaayog mga kamot
unya gadalag bunal nga ikog sa pagi ug sigig

bunal sa iyang likod, sa iyang mga tiil, nga daghan na kaayog samad
unya ang dugo nagtulo sa dalan samtang nagsigi kinig lakaw silong
sa init sa adlaw

mahal nga adlaw
morag greeting sa usa ka pait kaayong sulat alang sa uyab nga
mibulag na kaniya
kay wala na siyag kwarta

ang iyang sampot sapyot
larawan sa iyang pagkawalaydiyot,

morag misimang man
ang buang
morag nalayo na kaayo sa
angay nga tukibon

saliot, saliot nga utok
balik sa balay sa kukok


ang linya sa usa ka palad
nakabaton ug gamay'ng baba sa
atay,

giatay, giahak,

"nagkanindot ang imong
mga balak" maoy iyang congratulatory greeting

"mahal nga magbabalak
alang sa mahal nga adlaw" sumbingay niya

(dili na kinahanglan ang usa ka penitensya
ang pagbunal sa kaugalingon)

"ayaw kasuko
ayaw kahiubos
pagsadya
paglipay" malipayon niyang pagpadayon

(kay hapit na mapalong
ang imong kandila)

" hapit na moabot ang
adlaw
sa imong kagawasan" 
migawas sa gayod ang iyang pagkadesente diha sa iyang pagkaplastik.


desenteng haya
alang sa malipayong kamatayon.

Panginhas dire