3/15/2015

ang atong ipanghambog usahay mao man hinoon ang hinungdan sa atong kamatayon.

pito ka basa nga tuba, sinugbang unod sa kanding batan-on,
saging sab-a, si tony G, kuyog si Tony J.
si Rudy M.
Betty G. kuyog ang iyang anak nga bungi (apan natahi adtong lima na siya ka tuig unya karon
grade four na)

pagkapaspas ba gayod sa panahon

ang batang nagkamang pa sa salog nga imong nalabyan og nakita nimo sa ilang pultahan
karon dalagita na unya nagduyan-duyan nga lalom na usab og gihunahuna
og unsa kaha basin og bahin na usab kini sa kasubo sa iyang kinabuhi
pagkasayo pa kini niyang nabati

mahimo kaha usab kini siyang laing tigsulat sa kamingaw og kasakit?

78 na si Tony G. apan gikanunay na niya ang viagra nga baligya sa muslim niyang suki nga
namaligya usab niyag mga bold nga dvd
dili na maihap ang mga babayeng mamaligyaay og mangga nga misulod gawas sa iyang
pultahan nga tugas

si Rudy M., nagkiangkiang na intawon sa iyang arthritis apan dili gayod masipyat ang iyang
kalaog sa karneng kanding, ang iyang eskwelahan matag domingo kuyog sa boy ni Tony G.
nga og mapildi, magsigig bilatsimuina sa iyang asawa, og kon modaog, hinay ang tingog mapinanggaon nga motawag sa ngalan sa iyang bathala,

daghang sugilanon ang kabahin ni Betty, bulag sa bana, unya sa kalisod sa kinabuhi nakat-on usab
og pamaligyag mangga, gani gihungihong man nga si Tony G. nakapalit man usab og pipila ka kilo gikan kaniya, ang iyang kasagarang maamigo mao ang mga yotches sa Matam,

si Tony J (79)ang hilomon karong hapona nga nagsigig tungab sa iyang balon nga Tanduay, naputos na sa kalugo ang iyang lawas, puti na usab kaayo ang buhok, baga ang ngabil, nanimahong tuloy,
namatay ang asawa cancer of the breast, nagminyo og batan-on nakaanak pag laing usa ka totoy,

akong idugang si Batot ang batang lalaki nga anak sa boy ni Tony G. nga bisag 5 pa ka tuig nagpakita na sa iyang pagkababayen-on,  talinis ang tingog, sabaan, siging hawid sa saya sa iyang inahan nga buros na usab,

sa baybayon, sila ang among kauban sa usa ka prayer group, gamay ra ang maningog, ang ebangheldyo kabahin sa duha ka tawo: ang kolektor sa buhis nga nagsigig ampo pangayog pasaylo og ang parisio nga gikomparar ang iyang kaugalingon nga kuno walay buling sa sala.

gihisgotan ko ang kagalot sa usa ka usa nga taas og daghan kaayog sungay nga nanghambog sa iyang
koronang sungay didto sa usa ka pungak
unya sa dihang miabot ang leon nangaratil ang duha og dagan paingon sa ilalom sa kakahoyan
diin nasangit ang usa sa gipanghambog niini nga sungay,

busa, usahay ang atong ipanghambog usahay mao man hinoon ang hinungdan sa atong kamatayon

si Batot lamang ang morag nakasabot kabahin sa uwak nga maayog pagkabitik sa pagdayeg sa tusong fox.

"uncle, unsa man ang itsura anang  fox?" maoy iyang pangutana.

No comments :

Post a Comment

Lami ba?