2015/03/06

ango-ango

miabot ang panahon sa pagkalimot
si anna nahimong si mary anne

sa pagpangita mo sa kasilyas
nakaihi kas imong pantalon

miabot ang pagpangahulog sa
mga dahon hinay hinay tagsa tagsa

unya dili mo na mapunit kay
pati ang imong mga kamot nangahilis

miabot ang panahon nga ang tanan
nga imong gisaulo manglupad

unya ikaw na lang usa ang nahibilin
nga bisag manamin di mo na kini mailhan

ang imong mga anak magtinan-away
ang imong mga apo mangutana

sa inyong panihapon ikaw ang kataw-anan
apan dili mo na kini masabtan

kon maghisgot sila kanimo dili na sa hunghong
kay sayod sila ikaw dili na mao

Panginhas dire