3/15/2015

wala nay kalingkoran silong sa bagang dag-om sa langit.

sakay sa usa ka gakit
giampo na nimo ang sayong pag-abot
sa pikas tampi

kining islaha gidungog sa
usa ka bulawan nga langgam
nga kon moawit ang mga
buwak mamuwak
ang mga kahoy motugsoy
moduslak sa sabakan sa
langit

ang pangutana dili unsang
orasaha siya miabot
dili kon sa iyang pag-abot
wala bay dagkong bato
ang daplin sa dagat nga
naghatag og kasakit sa iyang
lapa-lapa

ang pangutana mao ang
kabahin sa pagbati, unsa
ba ang iyang gibati sa dihang
misangko na ang kiting sa
gakit didtos ngabil sa isla?

kay ning panahon sa pagluwas
ang mga pagbati lamang ang
angayang isugid.

kadtong nagsukitsukit kabahin
sa gakit, sa isla, sa langgam nga
bulawan og sa iyang awit,
wala nay kalingkoran silong
sa bagang dag-om sa langit.

No comments :

Post a Comment

Lami ba?